Naa de Wenn - Negenteinhunnertfiefunnegenti

Dann käm jo de Wenn', in mier ass een Hensich:

de Dütsche Wellervereenigung
wi sünd ümtrokken, inne Meckelbörger Straat, na Schlutup
ik kreeg Upträg ut Meckelbörg.

Too ierst schull för de Konsumsellschapp Gadebusch fun deeren Leegenschaffen, Kööpsteeln, Ferienhüüs un Waanungs de Wierte för de Bankens maakt warrn.

Bünn mit miene Mitabeiders krüz un kwer över de meckelborgschen Lann föört, wie hebbt de Buuten upmeeten, ik heff Goodachen doorför maakt. Hett nich lang duurt, kreeg ik de sülben Upgaaf fun den Konsum Grevesmööln. Up de Oort un Wies heff ik Meckelnborg kennliernt, geef dat dog in jedet Dörp een lütt Koopmannssteel, in jed Lüttstadt Kööp-un Waanhüüs, anne Küss Ferienwaanungs

As ik denn för den HBV een grötteres Huus in Wismar umbuun schull, heff ik Fiefunnegenti een Tweetkontor upmaakt, ierst an'n Wismarer Hooben inne Barack, doornaa in denn Umbuu, ass de trech würr.

Wat mi doomals good too pass käm (gift dat hüttoodags nich mier), de Konfrenzen begünnen all Klokk söben, un Kaffe geef dat soo, ass ik denn drink, maalen Kaffe in'n Beeker un kockkend Water doorup. Hüüt geit de Snackerie nich för Klokken ni loos, de Kaffe kümmt ut de Maschien.

Too doon harr ik veel, meist 'n beeten too veel. Kunn un wull avers nich anners. Bünn morns Klokk söss, halbi sööben ut'n Huus, in't Kontor eller up de Buusteel, käm ierst avens Klokken söben, ach weller trüch.

Wiern ook goode un groote Buuten doorbi, up de ik stolt bün, trech kreegen oon Mierkossen un rechtiedig.

Een doorfun wier de Umbuu fun dat Kontorhuus fun de Lübschen Hoobensellschap. Veer Etasch umbuut ünner loopen Bedreef, dat hde Lüüd hebbt jümmers een Etasch frimaakt, mööten sik up de annern updeelen; soo güng dat fun baaben na ünnen. In de ierste Etasch käm de Rezeptschon. doorför heff ik ierst ne Perspektiv konstriert. Vertell ik, wiel man dat hüüt mit'n Compschuter inne half Stünn trech kricht, ik avers heff dat allns 'toofoot' maken müss, Punk for Punk anne Teekenmaschien konstriert.Disse Rezeptschon un de Umbuu överhaupt hett mi avers een niegen Updraggever inbröcht. De Chef fun de Firma Railship (Isenbaanfärschipreederie Travmünn-Finland) harr dat seen un mi mit denn Umbuu fun siene Kontorruums in Travmünn beupdraagt. Ook meernmang siene Lüüd. Un nich nur dat, poor Joor laater würr hei de Chef fun de Wismarer Hoobensellschap, hett mi dat groote Hoobenabeiderhuus (too DDR-Tiden för dusind Hoobenabeiders) too'n Kontorhuus ut-un umbuun laaten.

Too glieke Tied heff ik inne Wismarer Hooben een Anlegger för Behörden-un Privatschips buut.

Wo ik nu all bi de Buueri bünn, kann ik joo maal uptellen, wat ik sünst nok trech kreegen heff:

För Lehmanns Betonwark ne Recyclinganlaag;

In de Betonwaagns blifft jümmers een Ress Beton, föörhier würr dat uutwuschen, wier too nix mier too bruuken. Mit de Anlaag würr de Zement ruutwuschen, de naablieven Sand weller verbruukt.

För Lehmanns Hoobenanlaags groote Lagerhallns;

up tooköfft Grunnstükks ierst de ollen, inne Kriegstied buuten Hallns afreeten, Hallns mit twölfdusind Quadratmeters buut.

Dat wiern jo Hallns för dat Afstelln fun Papierullns, de käm mit Schip ut Schweden. De Buuten kreegen Brandmeld- un Sprinkleranlaags . Dat Sprüttenwaater müss 'n half Stünn förholln; wiern poor dusind Kubikmeters Waater un een feer Meter lang Pump, de in dat Becken in't Ünnergeschoss anne Grund lääg.

De Zentral för de Brandschutzwaaterie wier in soon lütt Ruum inricht. Wieldat door so eng wier, hett een Montör bi ne Inspektschon uut Versein mit'n Moors de Sprinkleranlaag ingang, de eene Hall ünner Waater sett. De Papierrullns kunns wegschmieten, wier 'n groot, düürt Mallör.

För de Hoobensellschap Huusvergrötterungs;

In ‘ne Frankfurter Straat kreeg dat Kontorhuus een nieges Gschoss, käm ne Speditschon rin.
In Travmünn för dat Empfangsgebüüd dat sülbe, avers ‘n Huupen grötter. Un allns ünner lopend Bedreev.

För Langermanns in Woolnbarg anne Ostsee ‘ne Schüün to’n grootes Ferienhuus;

In de Schüün wiern to DDR-Tiden Feriengäst ünnerbröcht, harrn de Köök, den Wasch- und Tolettruum tosommen.

De heele oole Kraam würr rutreeten, ünn‘ käm dree lütte Ferienwaanungs, de Böön kreeg twei groote; dat Reetdack würr nideckt, för’t Lich geeft dat Fleddermuusgauvs.

För denn Flughooben niege Hallens;

Eene Hall för twee groote Flegers, feer Rundhallns för je söss Flegers; door müsst denn Footbaaden drei’n, doormit de Flegers dörch de Döör kunn.

För de Hamborger Grootspeditschon :

In Berlin-Spandau an’n Südhooben een groot Hall mit niegen Isenbananschlutt, Fürsprüttenwaterpump an’ne Kaimuur. De Rüchsied fun de Hall kreeg Extraladeramps so dat de LKWs trüchwards ranföörn un de Laadung mit eer Föörband inne Hall rulln kunn.

Sünst heff ik för de Firma P&C ook nok Plaans un Andrägs teikent för Hallns un niege Hooben-Anleggers in Köln un Dresden.

För de Firma OMS een Bootsmotornwarksteel;

In dat niege Industriegelänn ‚Holmer Barg‘ een Hall für’n Kontor un Verkööp, achtern Warksteel för’t Reparern fun Butenbordermotorn, Nattruums un Lager.

För de Bröer Schlichting een lütt Fabrikbuu;

Meist so, ass dat för Wolfgang Martin, avers füürn een Waandel un’n lütt Kontor, achternde Hall för Kunststoffarbeid. Mit Glasfasermattens un Kunstharz buun de Bootsrumps un Verkööpsbuuds för Ierdbeern.

För de Warft Grell een Bootshall;

Door käm in Harrs denn Winter över Seil- un Motorschips rin.